Sidhu Moosewala: ਪਰਿਵਾਰ ਦੇ ਵਿਰੋਧ ਦੇ ਬਾਵਜੂਦ YouTube’ਤੇ BBC ਨੇ ਡਾਕਿਊਮੈਂਟਰੀ ਕੀਤੀ ਜਾਰੀ
BBC ਨੇ ਸਿੱਧੂ ਮੂਸੇਵਾਲਾ ਦੇ ਕਤਲ ‘ਤੇ ਬਣਾਈ ਗਈ ਡਾਕਿਊਮੈਂਟਰੀ ਨੂੰ ਰਿਲੀਜ਼ ਕਰ ਦਿੱਤਾ ਹੈ । ਸਿੱਧੂ ਮੂਸੇਵਾਲਾ ਦੇ ਪਿਤਾ, ਬਲਕੌਰ ਸਿੰਘ, ਨੇ ਇਸ ਡਾਕਿਊਮੈਂਟਰੀ ਦੀ ਸਕ੍ਰੀਨਿੰਗ ਰੋਕਣ ਲਈ ਬੀਬੀਸੀ ਨੂੰ ਕਾਨੂੰਨੀ ਨੋਟਿਸ ਭੇਜਿਆ ਹੈ, ਜਿਸ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਇਹ ਉਨ੍ਹਾਂ ਦੀ ਇਜਾਜ਼ਤ ਤੋਂ ਬਿਨਾਂ ਬਣਾਈ ਗਈ। ਬੀਬੀਸੀ ਨੇ ਨੋਟਿਸ ਦਾ ਜਵਾਬ ਦਿੰਦਿਆਂ ਸਮਾਂ ਮੰਗਿਆ ਹੈ। ਬਲਕੌਰ ਸਿੰਘ ਨੇ 11 ਜੂਨ 2025 ਨੂੰ ਮੁੰਬਈ ਵਿੱਚ ਹੋਣ ਵਾਲੀ ਸਕ੍ਰੀਨਿੰਗ ਰੋਕਣ ਦੀ ਚੇਤਾਵਨੀ ਵੀ ਦਿੱਤੀ ਹੈ। ਇਸ ਲਈ, ਡਾਕਿਊਮੈਂਟਰੀ ਦੀ ਰਿਲੀਜ਼ ਅਤੇ ਸਕ੍ਰੀਨਿੰਗ ‘ਤੇ ਵਿਵਾਦ ਜਾਰੀ ਹੈ।
ਤੁਹਾਨੂੰ ਦੱਸ ਦਈਏ ਸਿੱਧੂ ਮੂਸੇਵਾਲਾ, ਇੱਕ ਮਸ਼ਹੂਰ ਪੰਜਾਬੀ ਰੈਪਰ, ਨੂੰ 29 ਮਈ 2022 ਨੂੰ ਪੰਜਾਬ ਦੇ ਮਾਨਸਾ ਜ਼ਿਲ੍ਹੇ ਦੇ ਜਵਾਹਰਕੇ ਪਿੰਡ ਵਿੱਚ ਅਗਿਆਤ ਹਮਲਾਵਰਾਂ ਨੇ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਸੀ। ਉਸ ਦੀ ਉਮਰ 28 ਸਾਲ ਸੀ ਅਤੇ ਉਸ ‘ਤੇ 24 ਗੋਲੀਆਂ ਮਾਰੀਆਂ ਗਈਆਂ ਸਨ। ਇਹ ਹਮਲਾ ਪੰਜਾਬ ਸਰਕਾਰ ਵੱਲੋਂ ਉਸ ਦੀ ਸੁਰੱਖਿਆ ਘਟਾਉਣ ਦੇ ਇੱਕ ਦਿਨ ਬਾਅਦ ਹੋਇਆ, ਜਿਸ ਨਾਲ ਜਨਤਕ ਅਤੇ ਸਿਆਸੀ ਰੋਸ ਪੈਦਾ ਹੋਇਆ। ਕੈਨੇਡਾ ਅਧਾਰਤ ਗੈਂਗਸਟਰ ਗੋਲਡੀ ਬਰਾੜ, ਜਿਸ ਦਾ ਸਬੰਧ ਲਾਰੈਂਸ ਬਿਸ਼ਨੋਈ ਗੈਂਗ ਨਾਲ ਦੱਸਿਆ ਜਾਂਦਾ ਹੈ, ਨੇ ਕਤਲ ਦੀ ਜ਼ਿੰਮੇਵਾਰੀ ਲਈ, ਪਰ ਹੁਣ ਤੱਕ ਕੋਈ ਸਜ਼ਾ ਨਹੀਂ ਹੋਈ ਅਤੇ ਕਤਲ ਦੇ ਮਕਸਦ ਅਜੇ ਸਪੱਸ਼ਟ ਨਹੀਂ ਹਨ।
Sidhu Moose Wala ਨਾਂ ਦੀ ਇਹ ਤਿੰਨ ਹਿੱਸਿਆਂ ਵਾਲੀ ਡਾਕਿਊਮੈਂਟਰੀ ਬੀਬੀਸੀ ਵਰਲਡ ਸਰਵਿਸ ਨੇ ਬਣਾਈ ਹੈ, ਜਿਸ ਦਾ ਮੇਜ਼ਬਾਨ ਬੌਬੀ ਫ੍ਰਿਕਸ਼ਨ ਹੈ। ਇਹ ਡਾਕਿਊਮੈਂਟਰੀ ਸਿੱਧੂ ਦੀ ਸ਼ੋਹਰਤ, ਸੰਗੀਤਕ ਕਰੀਅਰ, ਸਿਆਸਤ ਵਿੱਚ ਐਂਟਰੀ ਅਤੇ ਉਸ ਦੇ ਕਤਲ ਦੀਆਂ ਘਟਨਾਵਾਂ ‘ਤੇ ਚਾਨਣਾ ਪਾਉਂਦੀ ਹੈ। ਇਸ ਵਿੱਚ ਸਿੱਧੂ ਦੇ ਦੋਸਤਾਂ, ਪੱਤਰਕਾਰਾਂ, ਪੰਜਾਬ ਅਤੇ ਦਿੱਲੀ ਦੇ ਸੀਨੀਅਰ ਪੁਲਿਸ ਅਧਿਕਾਰੀਆਂ ਨਾਲ ਇੰਟਰਵਿਊ ਸ਼ਾਮਲ ਹਨ, ਨਾਲ ਹੀ ਗੋਲਡੀ ਬਰਾੜ ਦੀ ਆਡੀਓ ਇੰਟਰਵਿਊ ਵੀ ਹੈ।
ਉਨ੍ਹਾਂ ਨੇ ਮਹਾਰਾਸ਼ਟਰ ਦੇ ਡੀਜੀਪੀ ਅਤੇ ਮੁੰਬਈ ਦੇ ਜੁਹੂ ਪੁਲਿਸ ਸਟੇਸ਼ਨ ਵਿੱਚ ਸ਼ਿਕਾਇਤ ਦਰਜ ਕਰਵਾਈ, ਜਿਸ ਵਿੱਚ 11 ਜੂਨ 2025 ਨੂੰ ਜੁਹੂ ਦੇ ਸੋਹੋ ਹਾਊਸ ਵਿਖੇ ਹੋਣ ਵਾਲੀ ਸਕ੍ਰੀਨਿੰਗ ਨੂੰ ਰੋਕਣ ਲਈ ਕਿਹਾ ਗਿਆ। ਉਨ੍ਹਾਂ ਨੇ ਭਾਰਤੀ ਨਿਆਂ ਸੰਹਿਤਾ (BNS) ਜਾਂ ਹੋਰ ਕਾਨੂੰਨਾਂ ਅਧੀਨ ਪੁਲਿਸ ਨੂੰ ਕਾਰਵਾਈ ਕਰਨ ਦੀ ਅਪੀਲ ਕੀਤੀ ਪਰ ਬੀਬੀਸੀ ਨੇ ਪਰਿਵਾਰ ਦੇ ਵਿਰੋਧ ਦੇ ਬਾਵਜੂਦ 11 ਜੂਨ 2025 ਨੂੰ ਸਵੇਰੇ 5 ਵਜੇ ਯੂਟਿਊਬ ‘ਤੇ ਡਾਕਿਊਮੈਂਟਰੀ ਜਾਰੀ ਕਰ ਦਿੱਤੀ। ਇਹ ਸ਼ਾਮ 3 ਵਜੇ ਮੁੰਬਈ ਵਿੱਚ ਹੋਣ ਵਾਲੀ ਸਕ੍ਰੀਨਿੰਗ ਤੋਂ ਪਹਿਲਾਂ ਸੀ। ਡਾਕਿਊਮੈਂਟਰੀ ਨੂੰ ਸਿੱਧੂ ਦੀ ਜ਼ਿੰਦਗੀ, ਸੰਗਠਿਤ ਅਪਰਾਧ ਨਾਲ ਸੰਘਰਸ਼ ਅਤੇ ਪੰਜਾਬ ਦੇ ਸਮਾਜਿਕ-ਸਿਆਸੀ ਮਾਹੌਲ ਦੀ ਜਾਂਚ ਵਜੋਂ ਪੇਸ਼ ਕੀਤਾ ਗਿਆ।
