Deepika Kakkar ਦੀ ਸਟੇਜ 2 liver cancer surgery ਸਫਲ ਰਹੀ, Shoaib Ibrahim ਨੇ ਦਿੱਤੀ ਜਾਣਕਾਰੀ
ਮਸ਼ਹੂਰ ਟੀਵੀ ਅਦਾਕਾਰਾ ਦੀਪਿਕਾ ਕੱਕੜ, ਜੋ ਸਟੇਜ 2 ਜਿਗਰ ਦੇ ਕੈਂਸਰ ਨਾਲ ਜੂਝ ਰਹੀ ਸੀ, ਡਾਕਟਰਾਂ ਵੱਲੋਂ 3 ਜੂਨ, 2025 ਨੂੰ ਮੁੰਬਈ ਦੇ ਇੱਕ ਹਸਪਤਾਲ ਵਿੱਚ 14 ਘੰਟੇ ਦੀ ਸਫਲ ਸਰਜਰੀ ਕੀਤੀ ਗਈ । ਦੀਪਿਕਾ ਦੇ ਪਤੀ ਅਤੇ ਅਦਾਕਾਰ ਸ਼ੋਏਬ ਇਬਰਾਹਿਮ ਨੇ ਆਪਣੇ ਤਾਜ਼ਾ ਵਲੌਗ ਅਤੇ ਇੰਸਟਾਗ੍ਰਾਮ ਪੋਸਟ ਵਿੱਚ ਅਪਡੇਟ ਦਿੱਤਾ ਕਿ ਸਰਜਰੀ ਦੌਰਾਨ ਦੀਪਿਕਾ ਦੇ ਜਿਗਰ ਦਾ ਇੱਕ ਹਿੱਸਾ ਅਤੇ ਪਿੱਤੇ ਦੀ ਥੈਲੀ ਵਿੱਚ ਪਥਰੀ ਕਾਰਨ ਉਸ ਨੂੰ ਵੀ ਹਟਾਇਆ ਗਿਆ। ਸਰਜਰੀ ਤੋਂ ਬਾਅਦ ਦੀਪਿਕਾ ਨੂੰ ਆਈਸੀਯੂ ਵਿੱਚ ਰੱਖਿਆ ਗਿਆ ਸੀ |
ਸ਼ੋਏਬ ਨੇ ਦੱਸਿਆ ਕਿ ਦੀਪਿਕਾ ਨੂੰ ਆਈਸੀਯੂ ਤੋਂ ਹਸਪਤਾਲ ਦੇ ਕਮਰੇ ਵਿੱਚ ਸ਼ਿਫਟ ਕਰ ਦਿੱਤਾ ਗਿਆ ਹੈ, ਜੋ ਉਸ ਦੀ ਸਿਹਤ ਵਿੱਚ ਸੁਧਾਰ ਦਾ ਸੰਕੇਤ ਹੈ। ਉਸ ਨੇ ਇਹ ਵੀ ਦੱਸਿਆ ਕਿ ਜਿਗਰ ਦੀ ਸਵੈ-ਪੁਨਰਜਨਨ (self-restorative) ਸਮਰੱਥਾ ਕਾਰਨ ਇਹ ਸਰਜਰੀ ਸਫਲ ਰਹੀ, ਅਤੇ ਡਾਕਟਰਾਂ ਨੇ ਭਰੋਸਾ ਦਿੱਤਾ ਹੈ ਕਿ ਦੀਪਿਕਾ ਪੂਰੀ ਤਰ੍ਹਾਂ ਠੀਕ ਹੋ ਜਾਵੇਗੀ। ਸ਼ੋਏਬ ਨੇ ਪ੍ਰਸ਼ੰਸਕਾਂ ਦੀਆਂ ਦੁਆਵਾਂ ਅਤੇ ਸਮਰਥਨ ਲਈ ਦਿਲੋਂ ਸ਼ੁਕਰੀਆ ਕੀਤਾ ਅਤੇ ਅਗਲੇਰੀਆਂ ਅਪਡੇਟਸ ਦੇਣ ਦਾ ਵਾਅਦਾ ਕੀਤਾ।
ਦੀਪਿਕਾ ਨੇ ਮਈ 2025 ਵਿੱਚ ਆਪਣੀ ਸਟੇਜ 2 ਜਿਗਰ ਦੇ ਕੈਂਸਰ ਦੀ ਜਾਣਕਾਰੀ ਸੋਸ਼ਲ ਮੀਡੀਆ ‘ਤੇ ਸਾਂਝੀ ਕੀਤੀ ਸੀ, ਜਿੱਥੇ ਉਸ ਨੇ ਦੱਸਿਆ ਸੀ ਕਿ ਪੇਟ ਦੇ ਉਪਰਲੇ ਹਿੱਸੇ ਵਿੱਚ ਦਰਦ ਕਾਰਨ ਹਸਪਤਾਲ ਜਾਣ ਤੋਂ ਬਾਅਦ ਸੀਟੀ ਸਕੈਨ ਵਿੱਚ ਟੈਨਿਸ ਬਾਲ ਦੇ ਅਕਾਰ ਦਾ ਟਿਊਮਰ ਸਾਹਮਣੇ ਆਇਆ ਸੀ। ਉਸ ਦੀ ਇਸ ਬਿਮਾਰੀ ਕਾਰਨ ਉਸ ਨੂੰ ‘ਸੈਲੇਬ੍ਰਿਟੀ ਮਾਸਟਰਸ਼ੈਫ ਇੰਡੀਆ’ ਸ਼ੋਅ ਛੱਡਣਾ ਪਿਆ ਸੀ।
